The Noble Qur'an Encyclopedia

Alif Laam Raa Kun keeyyattoota kitaaba ibsaa ta’eeti. [1]

Nuti isa buufne Qur’aana Arabiffaa ta’e, akka isin xiinxaltaniif jecha.

Nuti seenaa gaggaarii sirratti odeessina Qur’aana kana gara keetti beeksisuudhaan, Ati isa dura dagattoota irraa taate.

Yeroo Yuusuf abbaa isaatin jedhe “Yaa abbaa kiyya! Ani (manaamaan) urjiiwwan kudha tokko, aduufi ji’a argeera; kan anaaf sujuuda godhan ta’anii isaan argeen jira” [yaadadhu]. [2]

(Abbaan isaas) ni jedhe: “Yaa ilma kiyya! manaama kee obboleeyyan keetti hin himin shira sirratti shiruu, sheyxaanni ilmaan namaatiif diina ifa bahaadha. [3]

( yaa yuusuf) Akka kanatti Gooftaan kee si filata; hiikkaa manaamaas si barsiisa; qananii Isaa sirrattiifi maatii Ya’aquub irrattis ni guuta, akkuma kana dura abbootii kee Ibraahiimiifi Isihaaq irratti guute. Dhugumatti, Gooftaan kee beekaa, ogeessa.”(jedheen).

Dhugumatti, (seenaa) Yuusufiifi obboleeyyan isaa keessa warreen gaafataniif mallattooleetu jira.

Yeroo (obboleeyyan Yuusuf) jedhan: “Dhugumatti, Yuusufiifi obboleessi isaa (tiruun) nurra gara abbaa keenyaatti jaalatamoodha, odoo nuti garee taanee jirru (akkamitti isaan nurra jaalata?), abbaan keenya dogoggora ifa bahaa keessa jira.

Yuusufiin ajjeesaa; yookiin dachii (fagootti) isa gataa; fuulli (jaalalti) abbaa keessanii isiniif dhuunfaa ta’a, Sana booda ummata gaggaarii taatu” (waliin jedhan). [4]

Isaan irraa jedhaan tokko (obboleessi tokko) ni jedhe: “Yuusufiin hin ajjeesinaa, hundee boollaa (eela) keessatti isa darbaa. akka gariin daldaltoota karaa deemu isa fudhatu, yoo kan dalagdan taataniif (kana hojjadhaa)”

Ni jedhan: “Yaa abbaa keenya! Sila ati maaliif Yuusuf irratti nu hin amanne? Nuti isaaf tola yaadoodha. [5]

Boru nu waliin isa ergi, Haa bashannanuu, haa taphatuu; nuti isaaf tiksitoota.”

(Abbaan isaanii)(Ya’aquub) ni jedhe: “Isa fuutanii deemuun keessan na gaddisiisa, yayyiin isa nyaachuun sodaadha, Isin isa irraa dagatoo taatanii .”

[Isaan] ni jedhan: “yoo yeyyiin isa nyaatte Odoo nuti garee taanee jirruu, nuti yeroo san hoongoftoota.” [6]

Yeroma isaan deemanii boolla gadi fagoo keessatti isa darbutti walii galan (isa darban). Nuti gara isaatti beeksifne “dhugumatti, ati hojii isaanii kana isaanitti himta odoo isaan (si) hin beekin” jechuun.

(Isaanis) abbaa isaanii bira dhufan galgala booyaatiin. [7]

Nijedhan “Yaa abbaa keenya! Nuti wal dorgomuuf deemne, Yuusufiin meeshaa keenya biratti dhiifnee, yeyyiin isa nyaate, ati nuuf kan amantuu (nudhuga'oomsituu) miti Odoma nuti warra dhugaa dubbatan taaneeyyuu”.

Qamisa isaa irratti dhiiga sobaatiin dhufan, (Yaaquub) ni jedhe: “Lakkisaa; Lubbuulee teessantu dubbii (sobaa) isiniif miidhagsite, (Obsi kiyya) obsa gaariidha, Waan isin jettan kana irratti gargaarsifatamaan Rabbi qofa.” [8]

Kara deemtonni (daldaaltoonni) dhuftee, bishaan waraabuduu isaanii erganii baaldii isaa (eela keessa) gadi buuse, “Yaa gammachuu! Kuni mucaa (bareedaadha)” jedhe, Meeshaa godhanii isa dhoksan, Rabbiin waan isaan hojjatan beekaadha. [9]

Gatii xiqqaa, maallaqa lakkaa’amtuutti, isa gurguran, Isa keessattis danta dhaboota irraa ta’an. [10]

Inni Misra irraa isa bites niitii isaatiin ni jedhe:(iddoo) qubsuma isaa kabaji “nu fayyaduun yookiin ilma isa taasifachuun keenya ni kejeelamaa", akka kanatti Yuusufiif dachii keessa mijjeessine, (Akka bulchaa isa goonuu) fi hiikoo manaamaas isa barsiifnuuf jecha. Rabbiin amrii Isaa irratti injifataadha, Garuu irra hedduun namaa hin beekan.[11]

Yeroo inni (dargaggoomee) jabummaa isaa ga’u, ogummaafi beekumsa isaaf kennine, Akka kanatti toltuu hojjattootaaf galata galchina.

Isheen inni mana ishee keessa jiru (qunnamtii saalaatiif) lubbuu isaa irraa isa abaabalte, Hulaalee ni cuccufte, nijette siif qophaa’eeraa kottu, nijedhe (yuusuf) Ani Rabbitti maganfadha! Inni (dhiirsi kee) gooftaa kiyya; jireenya koo naaf tolchee jira, Dhugumatti, miidhaa hojjattoonni hin milkaayanu”. [12]

Dhugumatti, isheen isatti yaadde, innis isheetti yaade, Odoo ragaa Gooftaa isaa arguu baatee. Akka kanatti hamtuufi hojii fokkataa isa irraa deebisuuf (ragaa keenya isa agarsiifne). inni gabroota keenya qulqulleeffamoo irraayyi.

(Isaan lamaan) gara balbalaa (fiigan) wal dorgoman, Isheen qamiisa isaa gara duubatiin dhoofte, Lamaanuu balbala biratti gooftaa (dhirsa) ishee argan, ni jette: “galanni (adabni) nama warra (niitii) keetti hamtuu yaadee hidhamuu yookiin adabbii laalessaa malee hin taane.” [13]

Inni (Yuusuf) ni jedhe: “Isheetu (qunnamtii saalaatiif) lubbuu kiyya irra na barbaadde, Ragaa bahaan maatii ishee irraa ta’e tokkos (akkana jechuun) ragaa bahe: “Yoo qamiisni isaa gara duraatiin baqaqfame, isheen dhugaa jettee inni kijibdoota irraayi.

Yoo qamiisni isaa gara duubaatiin baqaqfame, isheen ni sobdee inni dhugaa dubbattoota irraayi.”

Yeroma qamiisni isaa gara duubatiin kan baqaqfame ta’uu argu, (yuusuf dhugaa dubbatuufii isiin kijibuu hubatee) (dhirsi ishee) ni jedhe: “ kun shira keessan (dubartootaa) irraayyi. Dhugumatti, shirri keessan guddaadha.

Yuusuf kana irraa garagali (dubbii tana dhiisi namtokkotis hinhimin). Ati (intaloo) immoo badii keetiif araarama kadhu. ati warreen dogoggoran irraa taatee jirta.”

Dubartoonni magaalattii keessa jiranis ni jedhan: “Niitiin mootichaa gabra ishee (qunnamtii saalaatiif) lubbuu isaa irraa isa abaabalti, Jaalalli isaas onnee ishee seenee jira. Nuti jallina ifa ta’e keessatti ishee agarra.” [14]

Yeroma hamii isaanii dhageessu, gara isaaniitti ergite, makaddaa (fiiNyaata) isaaniif qopheessite, Tokko tokkoon isaaniitiif ablee (billaawa) kenitte. Isaan (yuusufiin) "irratti gadi bahi” jette. (gadi bahe) Yeroma isa argan isa dinqisiifatan (bareedina isaatiin dhama'anii) Harkoowwan isaaniis (osoo hinbeekin) mummuran, nijedhan “Rabbiin qulqulaa’ee, inni kun namaa miti, Inni kun maleykaa gaariidha malee waan biraatii miti”.

(Isheen) ni jette: “kun isa isin isa irratti na komattaniidha. Anatu (qunnamtii saalaatiif) lubbuu isaa irraa isa abaabbale, ni dide. (ammas gara fuulduraatti) Yoo inni waan ani isa ajaju dalaguu baate ni hidhama; Salphattoota irraa taha”.

[Inni] nijedhe “Gooftaa kiyya! Hidhaatu waan isaan itti na waaman irra ana biratti jaalatamaadha. Yoo Ati shira isaanii narraa deebifte malee, ani gara isaaniin daba; wallaaltota irraa taha”. [15]

Gooftaan isaa isaaf awwaatee shira isaanii isarraa deebise. Dhugumatti, Inni (Rabbiin) Isatu dhaga’aa, beekaadha.

Sana booda erga mallattoowwan (qulqullummaa isaa mul’isu) arganii, yeroo murtaa’eef isa hidhuutu isaaniif mul’ate.

Isa waliin dargaggeessi lama mana hidhaa seenan. Tokkoon isaan lamaanii ni jedhe: “ani (abjuudhaan) kanin farsoo cuunfun of arge”. Inni biraa immoo ni jedhe: “ani mataa kiyya gubbaatti daabboo baadhee kan allaattiin isa irraa nyaattun arge, hiika isaa nutti himi. Gaarii hojjattoota irraa ta’uu kee arginaa ” [16]

(Yuusuf) ni jedhe: “nyaanni isin isa nyaattan odoo inni isinitti hin dhufin dura hiika isaa isin lamaanitti himu malee isinitti hin dhufu; Kun wantoota Gooftaan kiyya na barsiise irraayyi. ani amantii (karaa) ummata Rabbitti hin amannee dhiise. isaan Aakiraatti kaafiroota.

Amantii (tawhiidaa tan) abboota kiyya Ibraahiim, Isihaaqiifi Ya’aquubis hordofeera. Waan tokkos Rabbitti qindeessuun nuuf hin taane. Kuni tola Rabbii kan nuufi namoota (hunda) irratti tahe. Garuu irra hedduun namootaa (Rabbiin) hin galateeffatanu. [17]

Yaa hiriyoota kiyya lamaan kan mana hidhaa! Sila gooftota adda addaa (tandharaa) (baay’ee) moo Rabbii tokkicha hunda mo’ataa ta’etu caala?

Maqoota isiniifi abbootiin keessan moggaaftan (taabota) malee Rabbii gaditti waan biraa gabbaraa hin jirtan. Rabbiin ishee (gabbaruu) tti ragaa tokkos hin buufne; murtiin Rabbiif malee hintaane. Isa malee akka hin gabbarre ajajeera. Kun amantii qajeelaadha. Garuu irra hedduun namaa hin beekanu.

Yaa hiriyoota kiyya kan mana hidhaa! Egaa isin lamaan keessaa tokko gooftaa (mootii) isaa farshoo obaasa, Inni biraa immoo fannifameeti allaattiin (foon) mataa isaarraa nyaatti, Dhimmi inni isin isa keessatti hiika gaafattan murtaa’ee jira.” [18]

Issaan lamaan keessaa isa (nagaa) baha jedhee yaadeen “Gooftaa kee biratti na dubbadhu” jedheen, Gooftaa isaatti dubbachuu sheyxaanni isa dagachiise, Waggaa muraasa mana hidhaa keessa ture.[19]

Mootichis ni jedhe: “ Ani sa’oota gabbataa ta’an torba kan (sa’oonni) huqqatoo ta’an torba nyaatan, akkasumas sootalloo (mataa midhaanii) magariisa torbaafi kan biraas gogaa (torba) abjuu keessatti argeera. Yaa qondaaltota (kiyya)! yoo kan manaama hiiktanu taataniif manaama kiyya kana naaf hiikaa”.

“(Kuni) bursusa (yaacoo) manaamaati. Nutis hiika bursusaa beektota hin taane” jedhan.

Inni isaan lamaan (mana hidhaa keessa turan) irraa nagaa ba’eefi yeroo dheeraa booda (Yuusufiin) yaadatee ni jedhe: “Anatu hiika isaa (Nama beeku gaafadhee)isinitti himaa na ergaa.” (nierganii) (Gara Yuusuf ni deeme).

(Innis ni jedhe): “Yaa Yuusufii dhugaa dubbataa taate! Sa’oota gabbatoo torba kan (sa’oonni) huqqatoon torba isaan nyaataniifi sootalloo (mataa midhaanii) magariisaa torbaafi kan biraas gogaa (torba) (namni manaamaan argee) hiika (abjuu kanaa) akka beekanuuf gara ummataa (tiifii mootichaa) deebi’ee isaanitti himuun koo ni kajeelamaa nuuf himi.

Ni jedhe: “Waggaa walitti aanan torbaaf akkuma barametti facaafattu. waan oomishtan (hinquunchisinaa) (hincalleessinaa) sootalloo isaa keessattinisa dhiisaa Xiqqoo waan irraa nyaattan malee.

Ergasii san booda, (waggoota) rakkinaa (caamaa) torbatu dhufa waan isin isaaniif keessan hunda kan nyaatanu, xiqqoo waan kuuftanii malee. [20]

Ergasii sana booda (waggaa torban caamaa booda) waggaa isa keessa ummanni rooba argataniifi isa keessas (inaba) cuunfatantu dhufa.”

Mootichis Isa natti fidaa jedhe. Yeroma ergamaan (mootichaa) isatti dhufu, (Yuusuf) ni jedhe: “Gara gooftaa keetii deebi’ii ‘waa’een dubartoota harka isaanii mummuranii maali’ (jedhii) isa gaafadhu. Dhugumatti Gooftaan kiyya shira isaanii beekaadha.” [21]

(Mootichis) “Yeroo Yuusufiin (sagaggaalummaaf) lubbuu isaa irra isa abaabbaltan haalli keessan maal ture?” jedheen. (Dubartoonni) ni jedhan: “Rabbiin qulqullaa’ee hamtuu tokkollee isa irratti hin beeknu”. Niitiin mootichaa nijette “Amma dhugaan ifa ta’eera, Anatu (sagaggaalummaaf) lubbuu isaa isa abaabbale, Dhugumatti, inni (qulqulluudha) warreen dhugaa dubbatan irraayyi”.[22]

“kun (gooftaan kiyya) fagootti (bakka inni hin jirretti) akka an isa hin ganin akka beekuufi, Rabbiin tooftaa gantootaa hinqajeelchu”

“Lubbuu tiyyas hin qulqulleessu, Dhugumatti, lubbuun hamtuutti ajajjuudha nama Gooftaan kiyya rahmata godheef malee, Gooftaan kiyya araaramaa, rahmata godhaadha.”

Mootichis ni jedhe: “lubbuu kootiifan isa dhuunfadhaa isaan natti kottaa. Yeroma isa (Yuusufiin) hasofsiisu, “Ati har’a nu biratti mijjeeffataa amanamaadha” jedheen. [23]

(Yuusufis) “kuusaa dachii (kan midhaaniifii qabeenyaa)irratti (itti gaafatamaa) na taasisi; ani isa irratti eegaa beekaadha” jedhe. [24]

Akka kanatti Yuusufiif dachii keessatti mijjeessine, ishee irraa bakka fedhe kan qubatu ta’ee. Rahmata keenyaan nama feene tuqna. Mindaa warreen toltuu hojjataniis hin balleessinu.

Dhugumatti, isaannan amananii (Rabbiin) kansodaatan ta’aniif mindaa Aakiraatu caala.

Obboleeyyan Yuusuf gara isaa dhufanii isa irratti ol seenan, inni isaan beeke isaan isa wallaaloodha.

Yeroma waan geggeessaa isaanii (midhaan) isaaniif qopheesse ni jedhe: “Obboleessa keessan (kan abbaa keessan biratti hafe) kan karaa abbaatiin ta’een natti kottaa. sila safara guutuu koo hin argitanuu? ani caalaa keessummeessitootaati.

Yoo isaan natti dhufuu baattan safarri na bira isiniif hin jiru (midhaan hin argattan), Nattis hin dhiyaatinaa (biyya tiyya hinseentan).”

[Isaan] nijedhan “Nuti waa’ee isaa abbaa isaa ni gaafanna, nuti (dhimma kana) raawwatoodha.”

Hojjattoota isaatiin nijedhe “akka yeroo gara maatii isaanii deebi’an ishee beekanii deebi’aniif maallaqa isaanii fe’isa isaanii keessa kaa’aa”. [25]

Yeroma gara abbaa isaanii deebi’an ni jedhan: “Yaa abbaa keenya! (yoo obboleessa keenya fuunee hindhaqin) safarri (midhaanii) nurraa dhorgameera. Obboleessa Kenya nuu wajjiin ergi. Ni safaranna. Nuti dhugumatti isaaf tiksoodha”

(Ya’aquub) ni jedhe: “Sila akkan duraan obboleessa isaa (tiruu yuusuf) irratti isin amane malee isa irratti isin amanaa? Rabbiin eegaa ta’uutti caalaadha. Inni irra rahmata godhaa warreen rahmata godhaniiti.” [26]

Yeroma meeshaa isaanii bananii maallaqa isaanii kan isaaniif deebi’e ta’uu argan ni jedhan: “Yaa abbaa keenya! (kana caalaa) maal barbaanna? Isheen kuni maallaqa keenya; gara keenya deebifamte. Maatii keenyaaf nishammadanna, Obboleessa keenyas ni tiksina, Fe’iinsa (ba’aa) gaalaa tokkoos ni dabalanna, Kun (mooticha biratti) safara xiqqoodha.”

(Ya’aquub) ni jedhe: “isa isin wajjiin hin ergu hanga akka isa deebiftanii naaf fiddanutti kakuu Rabbi irraa ta’e naaf kennitanitti, Yoo (diinaan) marfamtan malee .” Yeroma isaan kakuu isaanii isaaf kennan “Rabbiin waan nuti jennu irratti ragaadha” jedhe.

Ni jedhe: “Yaa ilmaan kiyya! balbala tokkoon hin seeninaa, Balbaloota adda addaatiin seenaa, Ani (murtii) Rabbii irraa homaa isin irraa hin duroomsu, murtiin Rabbiif malee hintaane. Isa (qofa) irratti hirkadhe, Hirkattoonni isuma (qofa) irratti haa hirkatani.”

Yeroma isaan akkaataa abbaan isaanii isaan ajajeen seenani, (murtii) Rabbii irraa homaa kan isaan duroomsu (isaanirraa deebisu) hin taane. Garuu dhimma lubbuu Ya’aquub keessa jiru ishee baasee. inni waan isa barsiifne irratti abbaa beekumsaati. Garuu irra hedduun namaa hin beekanu. [27]

Yeroma isaan Yuusuf irratti seenan obboleessa isaa ofitti dhiheessee, (dhooyastti jedheen) “ani anatu obboleessa keetii, waan isaan kan hojjachatan tahanitti hin gaddin” jedhe.

Yeroma meeshaa isaanii isaaniif qopheessu, safartuttii (osoo isaan hinbeekin) meeshaa obboleessa isaa keessa kaa’e, Sana booda (yeroo isaan fe'atanii karaa seenan) lallabaan ni lallabe “isin yaa daldaaltoota isin hattoota” (jedheen). [28]

Isaanis, gara isaanii (warreen itti lallabanii) gara galuun, “Maal dhabdan?” jedhaniin.

Ni jedhan: “Nuti safartuu mootii dhabnee; nama (osoo sakatta'amee hinqabamnetti) isa fideef (badhaasa) (midhaan) fe’aa gaalaa tokkotu isaaf jira. Ani kana irratti waadaa galaadha.”

Isaanis ni jedhan: “Rabbitti kakannee! Akka nuti dachii keessatti badii raawwachuuf hin dhufin isinis beektanii jirtu, Nuti hattoota hin taane.”

“Yoo sobdoota taataniif (nama hate) adabbiin isaa maal ta’a?” jedhaniin.

Ni jedhan: “Adabni isaa namni inni meeshaa isaa keessatti argame isumatu (fuudhamuutu) adabbii isaati, Nuti akka kanatti isaan miidhaa (hanna) raawwatanu adabna.” [29]

(Sakkatta’uus) qalqalloo obboleessa isaa dura qalqalloo isaaniitiin jalqabe, eegasii meeshaa obboleessa isaa keessaa ishee baase. Akka kanatti Yuusufiif tooftaa baafne, obboleessa isaa seera mootichaa keessatti kan fudhatu hin turre Odoo Rabbiin Fedhuu baatee. Nama feene sadarkaalee hedduu ol fuuna. Abbootii beekumsaa hundaa olittuu beekaatu jira. [30]

Isaan (obboleeyyan Yuusuf) ni jedhan: “Yoo hates, (waan haarawaa miti) obboleessi isaas (Yuusufis) kana dura hatee ture.” Yuusuf ishee lubbuu isaa keessatti dhokse, Isaaniif ishee hin ibsine (Of keessattis) ni jedhe: “Isinumatu sadarkaan keessan gadheedha. Rabbiin waan isin jettan (kijibdan) beekaadha.”

Isaanis ni jedhan: “Yaa mootichaa! isaaf abbaa jaarsa manguddoo ta’etu (kan haalaan isa jaalatu) jira. Kanaaf bakka isaa tokkoon keenya fudhadhu. Nuti gaggaarii irraa ta’uu kee si argina.”

(yuusuf) ni jedhe: “Nuti nama meeshaa keenya isa biratti argine malee (nama qulqulluu) fudhachuu irraa Rabbitti maganfanna. nuti yeroo san miidhaa hojjattoota.”

Yeroma isa irraa abdii muratan, kan maryatan ta’anii kophaa ba’an, Guddaan isaanii ni jedhe: “Sila dhugumatti abbaan keessan kakuu Rabbi irraa ta’e isin irratti qabachuufi kana duras Yuusuf irratti waan daangaa dabartan hin beektanuu? Kanaaf ani hanga abbaan kiyya naaf hayyamutti yookiin (hanga) Rabbiin dhimma kana naaf murteessutti dachii kana gadi hin dhiisu. Inni irra caalaa murteessitootaati. [31]

Gara abbaa keessanii deebi’aatii jedhaanii: “Yaa abbaa keenya! ilmi kee ni hate, Nuti waan beekneen malee ragaa hin baane. Nuti waan fagoo tiksitoota hin taane. [32]

(Namoota) magaalaa nuti ishee keessa turreefi daldaaltota nuti isaan wajjin dhufnes gaafadhu, Nuti dhugaa dubbatoodha.”

(Ya’aquub) ni jedhe: “Lakkisaa; lubbuulee teessantu waa (hamtuu) isiniif midhaagsite (isa hojjattan); (Obsi koo) obsa bareedaadha, Rabbiin hunda isaan (sadeenuu) naaf deebisuun ni kajeelama. Inni Isumatu beekaa, ogeessa.”

Isaan irraas gargalee “Yaa gadda kiyya! Yuusufirratti” jedhe, gaddarraa irraa ijji isaa lamaanis (gurraattiin isii) addaatte; inni yaadaan guutamaadha.

Nijedhan “Rabbitti kakannee! ati hanga manguddoo dadhabaa taatutti yookiin warra du’an irraa taatutti Yuusufiin dubbachuu irraa hin deemtu!”.

(Ya’aquub) ni jedhe: “Ani yaaddoofi gadda kiyyas Rabbuma qofattin himadha, Rabbirraa waan isin hin beeknen beeka.

Yaa ilmaan kiyya! deemaa Yuusufiifi obboleessa isaa irraa odeeffadhaa. Rahmata Rabbii irraa abdii hin muratinaa. rahmata Rabbii irraa abdii hin kutu ummata kaafiroota malee.”

Yeroma isa (Yuusuf) irratti seenan isaan jedhan Ati Yaa mootichaa! nuufi maatii keenyas rakkoon mudateera. Mallaqa tuffatamtuun dhufnee, safara nuuf guutii, nurrattiis sadaqadhu, Rabbiin warreen sadaqataniif galata galcha.

(Yuusuf) nijedhe “Sila waan Yuusufiifi obboleessa isaa irratti yeroo wallaaloo turtan hojjattan beektuu?”.

[Isaan] nijedhan “Sila ati sumaatu Yuusufii?”, [Inni] nijedhe “Ani Yuusufi; inni kunis obboleessa kiyya, Dhugumatti Rabbiin tola nutti ooleera. namni (Rabbiin) sodaateefi obse, Rabbiin mindaa toltuu hojjattootaa hin balleessu.

[Isaan] nijedhan “Rabbitti kakannee! Dhugumatti, Rabbiin nurra si filatee jira. Dhugumatti nuti dogoggortoota turre”.

(Yuusufis) ni jedhe: “Har’a komiin isin irra hin jiru; Rabbiin isiniif araarama. Inni irra rahmata godhaa warra rahmata godhaniiti. [33]

Qamisii kiyya kanaan deemaatii fuula abbaa kiyyaa irratti darbaa. [Inni] argaa ta’ee dhufa, Maatiiwwan keessan hundaan natti kottaa.”[34]

Yeroma daldaltoonni (Misrarraa) achibaatee, (gara galaa deemte), abbaan isaanii nijedhe “ani foolii yuusufin argaa (hafuurri yuusuf natti urgaaye), Odoo isin totorra’aatti na yaaduu dhabdanii ”.

[Isaan] “Rabbitti kakannee! ati dogoggora kee kan durii keessa jirta” jedhan.

Gammachiisaan Yeroma dhufu fuula isaa (Ya’aquub) irratti isa (qamisaa yuusuf) darbe. Innis kan argu ta’e (ijji nibanamteef) “Ani Rabbi irraa waan isin hin beeknen beeka isiniin hin jennee?” jedhe.

[Isaan] “Yaa abbaa keenya! (Rabbiin) araarama nuuf kadhu badiilee keenyaaf. nuti dogoggortoota taanee jirraa” jedhan.

(Ya’aquubis) “Ani fuul-duratti Gooftaa kiyya araarama isiniifin kadha. Inni Isatu araaramaa, rahmata godhaadha” jedhe.

Ergasii yeroo Yuusufiin bira seenan, haadhaafi abbaa isaa gara ofiitti qubsiise, nijedhe “Yoo Rabbiin fedhe nagayaan Misraan seenaa”

Abbaafi haadha isaa siree irratti ol fuudhe, Isaan sujuuda isaaf bu’an, [Inni] ni jedhe: “Yaa abbaa kiyya! kun hiika manaama kiyyaa kan duraaniiti. Gooftaan kiyya dhugaa ishee taasiseera. Gooftaan kiyya tola natti oolee jira. yeroo mana hidhaa irraa na baasee, isin baadiyaa irraa isinfidhe, Erga shayxaanni anaafi obboleeyyan kiyya gidduu diinumse booda, Gooftaan kiyya nama fedheef mararfataadha, Inni Isumaatu beekaa, ogeessa. [35]

Gooftaa kiyya! dhugumatti mootummaa irraa naaf kennitee jirta, Hiika manaamotaa irraas na barsiiftee jirta, (Yaa) Uumoo samiifi dachii! Ati Duuniyaafi Aakhiraattis gargaaraa kiyya. Muslimummarratti na ajjeesii, Warra gaggaarittis na dhaqqabsiisi.” [36]

Kun oduulee fagoo irraayyi, Gara keetti isa beeksifna, ati isaan bira hin turre Yeroo isaan kan (Yuusufitti) shira baasan ta’anii dhimma isaanii waliin qindeessan.

Irra hedduun namootaa (amanuu isaaniitiif) odoo bololtellee kan amananii miti.

Ati isa irratti mindaa wahii isaan hin gaafattu, Inni (Qur’aanni) aalamaaf gorsa malee waan biraatii miti.

Samiileefi dachii keessa mallattoo kan isaan ishee irraa gara galan ta’anii ishee irra taran heddutu jira.

Irra hedduun isaanii qindeessitoota ta’anii malee Rabbitti hin amananu.

Sila Rabbi irraa haguugduun adabbii Rabbii irraa taate tasa haala isaan hin beekneen isaanitti dhufuu yookiin Qiyaamaan isaanitti dhufuu of amanuu (sodaa dhabanii)?

jedhi “Kun karaa kiyya gara Rabbiitti waama beekumsa irratti haala ta’een Aniifi namni na hordofes. Rabbiin qulqullaa’e Ani Mushrikoota irraayyii miti” jedhi.

Si duras dhiirota warra gandaa irraa wahyii gara isaaniitti buufne malee hin ergine. Sila dachii keessa deemanii booddeen warra isaaniin dura turanii akkam akka ta’e hin ilaalanuu? Dhugumatti, isaan (Rabbiin) sodaataniif mana Aakhiraatu caala. Sila hin xiinxaltanuu?

hanga Ergamoonni abdii murataniifi dhugumatti kijibsiifamuu beekanitti tursiifamee tumsi keenya isaaniif dhufe, namni feene baraarame. adabbiin keenyas ummata yakkamtoota irraa hin deebifamu.

Dhugumatti, seenaalee isaanii keessa warra aqlii qabaniif gorsatu jira. Inni (Qur’aanni) oduu lafaa kaafamee odeeffame hin taane. Garuu dhugoomsaa (kitaabban) isa duraati. Addeessaa wantoota hundaati; qajeelfamaafi rahmata ummata amananiif.